ಬಿಜೆಪಿಯಿಂದ ಗಾಂಧಿ ಸಂಸ್ಥೆಗಳ ಸ್ವಾಧೀನ ಖಂಡಿಸಿದ ಖರ್ಗೆ, ಮಹಾನ್ ನಾಯಕರ ವಿರುದ್ಧದ ಪಿತೂರಿ ಎದುರಿಸುವುದಾಗಿ ಪ್ರತಿಜ್ಞೆ

"ಪಟೇಲ್ ಮತ್ತು ನೆಹರೂ ನಡುವೆ ಭಿನ್ನಾಭಿಪ್ರಾಯವನ್ನು ಬಿತ್ತುವ ಪ್ರಯತ್ನ ನಡೆಯುತ್ತಿದೆ. ಆದರೆ ಅವರು ಬೇರ್ಪಡಿಸಲಾಗದ ಮಿತ್ರರು, ಒಂದೇ ನಾಣ್ಯದ ಎರಡು ಮುಖಗಳು" ಎಂದು ಹೇಳಿದರು.

ಅಹಮದಾಬಾದ್: 64 ವರ್ಷಗಳ ಬಳಿಕ ಬಿಜೆಪಿಯ ಭದ್ರಕೋಟೆ ಎಂದೇ ಬಿಂಬಿತವಾಗಿರುವ ಗುಜರಾತ್ ನಲ್ಲಿ 84ನೇ ಕಾಂಗ್ರೆಸ್ ಅಧಿವೇಶನ ಮಂಗಳವಾರ ಅಹಮದಾಬಾದ್‌ನಲ್ಲಿ ಆರಂಭವಾಗಿದೆ.

ಎರಡು ದಿನಗಳ ಈ ಅಧಿವೇಶನ(ಏಪ್ರಿಲ್ 8-9) ಐತಿಹಾಸಿಕ ಮಹತ್ವವನ್ನು ಹೊಂದಿದೆ. ಏಕೆಂದರೆ ಗುಜರಾತ್‌ನಲ್ಲಿ ಕೊನೆಯ ಬಾರಿ ಕಾಂಗ್ರೆಸ್ ಅಧಿವೇಶನ 1961 ರಲ್ಲಿ ಭಾವನಗರದಲ್ಲಿ ನಡೆದಿತ್ತು. ಸ್ವಾತಂತ್ರ್ಯದ ನಂತರ ರಾಜ್ಯದಲ್ಲಿ ನಡೆದ ಮೊದಲ ಅಧಿವೇಶನ ಇದು.

ಏರ್ ಇಂಡಿಯಾ ವಿಮಾನಕ್ಕೆ ಬಾಂಬ್ ಬೆದರಿಕೆಯಿಂದಾಗಿ ಅರ್ಧ ಗಂಟೆ ವಿಳಂಬವಾಗಿ ಕಾಂಗ್ರೆಸ್ ನಾಯಕರಾದ ರಾಹುಲ್ ಗಾಂಧಿ ಮತ್ತು ಸೋನಿಯಾ ಗಾಂಧಿ ಅವರು ಇಂದು ಬೆಳಗ್ಗೆ 10:30 ರ ಸುಮಾರಿಗೆ ಅಹಮದಾಬಾದ್‌ಗೆ ಆಗಮಿಸಿದ್ದಾರೆ.

ಐತಿಹಾಸಿಕ ಸರ್ದಾರ್ ಸ್ಮಾರಕದಲ್ಲಿ ಕಾಂಗ್ರೆಸ್ ಕಾರ್ಯಕಾರಿ ಸಮಿತಿ(ಸಿಡಬ್ಲ್ಯೂಸಿ) ಸಭೆ ನಡೆಯುತ್ತಿದ್ದು, ಸಭೆಯ ನಂತರ ಇಬ್ಬರು ನಾಯಕರು ಸಂಜೆ ಸಬರಮತಿ ಆಶ್ರಮಕ್ಕೆ ಭೇಟಿ ನೀಡಲಿದ್ದಾರೆ. ಏತನ್ಮಧ್ಯೆ, ಪ್ರಿಯಾಂಕಾ ಗಾಂಧಿ ಇನ್ನೂ ಅಹಮದಾಬಾದ್‌ಗೆ ಬಂದಿಲ್ಲ, ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ, ಮುಖ್ಯಮಂತ್ರಿ ಸಿದ್ದರಾಮಯ್ಯ, ಡಿಸಿಎಂ ಡಿ.ಕೆ ಶಿವಕುಮಾರ್ ಸೇರಿದಂತೆ ಹಲವು ನಾಯಕರು ಭಾಗವಹಿಸಿದ್ದಾರೆ.ಏಪ್ರಿಲ್ 9 ರಂದು ಸಬರಮತಿ ನದಿಯ ದಡದಲ್ಲಿ ಕಾಂಗ್ರೆಸ್ ಅಧಿವೇಶನ ನಡೆಯಲಿದೆ. ಇದರಲ್ಲಿ ಸುಮಾರು 2,500 ನಾಯಕರು ಮತ್ತು ಅಖಿಲ ಭಾರತ ಕಾಂಗ್ರೆಸ್ ಸಮಿತಿಯ(ಎಐಸಿಸಿ) ಸದಸ್ಯರು ಭಾಗವಹಿಸಲಿದ್ದಾರೆ. ಈ ಅಧಿವೇಶನದಲ್ಲಿ ರಾಜಕೀಯ, ಆರ್ಥಿಕ ಮತ್ತು ಸಾಮಾಜಿಕ ವಿಷಯಗಳ ಕುರಿತು ನಿರ್ಣಯಗಳನ್ನು ಅಂಗೀಕರಿಸಲಾಗುತ್ತದೆ.

ಗುಜರಾತ್‌ನ ಮೂವರು ಮಹಾನ್ ನಾಯಕರು ಕಾಂಗ್ರೆಸ್ ಅನ್ನು ಜಾಗತಿಕವಾಗಿ ಬೆಳೆಸಿದ್ದಾರೆ ಎಂದು ಹೇಳಿದ ಖರ್ಗೆ, ದಾದಾಭಾಯಿ ನವರೋಜಿ, ಮಹಾತ್ಮ ಗಾಂಧಿ ಮತ್ತು ಸರ್ದಾರ್ ವಲ್ಲಭಭಾಯಿ ಪಟೇಲ್ ಅವರು ಕಾಂಗ್ರೆಸ್‌ ಅಧ್ಯಕ್ಷರಾಗಿದ್ದನ್ನು ಉಲ್ಲೇಖಿಸಿದರು.

ಗಾಂಧಿಯವರು ರಾಷ್ಟ್ರಕ್ಕೆ ಸತ್ಯ ಮತ್ತು ಅಹಿಂಸೆಯ ಪ್ರಬಲ ಆಯುಧಗಳನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಯಾವುದೇ ಶಕ್ತಿ ಎಂದಿಗೂ ಅವರ ತತ್ವಶಾಸ್ತ್ರಗಳನ್ನು ನಿಗ್ರಹಿಸಲು ಸಾಧ್ಯವಿಲ್ಲ ಎಂದರು.

ಆದರೆ ಇಂದು, ಕೋಮು ವಿಭಜನೆ ಬಿತ್ತಲಾಗುತ್ತಿರುವುದರಿಂದ ಮತ್ತು ದೇಶದ ಸಂಪನ್ಮೂಲಗಳನ್ನು ನಿಯಂತ್ರಿಸಲು ಒಲಿಗಾರ್ಸಿಸ್ಟ್ ಏಕಸ್ವಾಮ್ಯ ಯತ್ನಿಸುತ್ತಿದೆ. ಈ ಮೂಲಕ ಪ್ರಮುಖ ರಾಷ್ಟ್ರೀಯ ಸಮಸ್ಯೆಗಳಿಂದ ಜನರ ಗಮನ ಬೇರೆಡೆಗೆ ಸೆಳೆಯಲಾಗುತ್ತಿದೆ ಎಂದು ಖರ್ಗೆ ವಿಷಾದ ವ್ಯಕ್ತಪಡಿಸಿದರು.

ಈ ವರ್ಷ, ಅಕ್ಟೋಬರ್ 31 ರಂದು, ದೇಶವು ಸರ್ದಾರ್ ಪಟೇಲ್ ಅವರ 150 ನೇ ಜನ್ಮ ದಿನಾಚರಣೆಯನ್ನು ಆಚರಿಸಲಿದೆ. ಅವರನ್ನು ನೆಹರೂ ಒಮ್ಮೆ "ಭಾರತದ ಏಕತೆಯ ಸ್ಥಾಪಕ" ಎಂದು ಕರೆದಿದ್ದರು ಎಂದು ಖರ್ಗೆ ಹೇಳಿದರು.

ಪಟೇಲ್ ಅವರ ನಾಯಕತ್ವ ಅಲ್ಲಿಗೆ ನಿಲ್ಲಲಿಲ್ಲ; ಅವರು ಸಂವಿಧಾನ ಸಭೆಯೊಳಗಿನ 'ಮೂಲಭೂತ ಹಕ್ಕುಗಳು, ಅಲ್ಪಸಂಖ್ಯಾತರು, ಬುಡಕಟ್ಟು ಮತ್ತು ಹೊರಗಿಡಲಾದ ಪ್ರದೇಶಗಳ ಕುರಿತಾದ ನಿರ್ಣಾಯಕ ಸಲಹಾ ಸಮಿತಿ'ಯ ಅಧ್ಯಕ್ಷತೆಯನ್ನೂ ವಹಿಸಿದ್ದರು. ಆದರೆ ಕೆಲವರು ಕಾಂಗ್ರೆಸ್‌ನ 140 ವರ್ಷಗಳ ಹೆಮ್ಮೆಯ ರಾಷ್ಟ್ರ ಸೇವೆ ಮತ್ತು ತ್ಯಾಗದ ಪರಂಪರೆಯನ್ನು ವಿರೂಪಗೊಳಿಸುತ್ತಿದ್ದಾರೆ ಎಂದು ಖರ್ಗೆ ಬಿಜೆಪಿ ವಿರುದ್ಧ ವಾಗ್ದಾಳಿ ನಡೆಸಿದರು.

"ಪಟೇಲ್ ಮತ್ತು ನೆಹರೂ ನಡುವೆ ಭಿನ್ನಾಭಿಪ್ರಾಯವನ್ನು ಬಿತ್ತುವ ಪ್ರಯತ್ನ ನಡೆಯುತ್ತಿದೆ. ಆದರೆ ಸತ್ಯವೆಂದರೆ ಅವರು ಬೇರ್ಪಡಿಸಲಾಗದ ಮಿತ್ರರು, ಒಂದೇ ನಾಣ್ಯದ ಎರಡು ಮುಖಗಳು" ಎಂದು ಹೇಳಿದರು.

ಪಟೇಲ್ ಮತ್ತು ನೆಹರೂ ನಡುವಿನ ಪತ್ರವ್ಯವಹಾರವು ದೈನಂದಿನ ವ್ಯವಹಾರವಾಗಿತ್ತು ಎಂದು ಖರ್ಗೆ ಹೇಳಿದರು. ನೆಹರೂ ಅವರು ಪಟೇಲರ ಬಗ್ಗೆ ಹೊಂದಿರುವ ಗೌರವವನ್ನು ಒತ್ತಿ ಹೇಳಿದರು, ಆಗಾಗ್ಗೆ ಅವರ ಸಲಹೆಯನ್ನು ಪಡೆಯುತ್ತಿದ್ದರು ಮತ್ತು ಅವರ ಅನುಕೂಲಕ್ಕಾಗಿ ಪಟೇಲರ ನಿವಾಸದಲ್ಲಿಯೇ ಸಿಡಬ್ಲ್ಯೂಸಿ ಸಭೆಗಳನ್ನು ಸಹ ನಡೆಸುತ್ತಿದ್ದರು ಎಂದರು.

ಪಟೇಲರು ನಿಷೇಧಿಸಿದ ಸಂಘಟನೆಯಾದ ಆರ್‌ಎಸ್‌ಎಸ್‌, ಇಂದು ಅವರ ಪರಂಪರೆಯನ್ನು ಪಡೆಯಲು ಯತ್ನಿಸುತ್ತಿರುವ ವಿಪರ್ಯಾಸ ಖರ್ಗೆ ಕಟುವಾಗಿ ಟೀಕಿಸಿದರು. ಸಂವಿಧಾನ ಸಭೆಯಲ್ಲಿ ಡಾ.ಬಿ.ಆರ್. ಅಂಬೇಡ್ಕರ್ ಅವರ ಸ್ಥಾನವನ್ನು ಖಚಿತಪಡಿಸಿಕೊಳ್ಳುವಲ್ಲಿ ಕಾಂಗ್ರೆಸ್ ವಹಿಸಿದ ಪ್ರಮುಖ ಪಾತ್ರವನ್ನು ಅವರು ಎತ್ತಿ ತೋರಿಸಿದರು, 1949 ರಲ್ಲಿ ಡಾ. ಅಂಬೇಡ್ಕರ್ ಅವರ ಅಂತಿಮ ಭಾಷಣದಲ್ಲಿ ಈ ಅಂಶವನ್ನು ಸ್ವತಃ ಒಪ್ಪಿಕೊಂಡಿದ್ದರು ಎಂದರು.

ಸಂವಿಧಾನವನ್ನು ಅಂತಿಮಗೊಳಿಸಿದಾಗ, ಆರ್ ಎಸ್ಎಸ್ ಅದನ್ನು ತೀವ್ರವಾಗಿ ವಿರೋಧಿಸಿತು. ಗಾಂಧಿ, ನೆಹರು ಮತ್ತು ಅಂಬೇಡ್ಕರ್‌ರಂತಹ ಪ್ರಮುಖ ನಾಯಕರ ಪ್ರತಿಕೃತಿಗಳನ್ನು ಸಹ ಸುಟ್ಟುಹಾಕಿತು ಎಂದು ಖರ್ಗೆ ಸಿಡಬ್ಲ್ಯೂಸಿಗೆ ನೆನಪಿಸಿದರು.

ಗಾಂಧಿಯವರ ಪರಂಪರೆಗೆ ಸಂಬಂಧಿಸಿದ ವಾರಣಾಸಿಯ ಸರ್ವ ಸೇವಾ ಸಂಘ ಮತ್ತು ಗುಜರಾತ್ ವಿದ್ಯಾಪೀಠದಂತಹ ಸಂಸ್ಥೆಗಳನ್ನು ಬಿಜೆಪಿ ಮತ್ತು ಸಂಘ ಪರಿವಾರ ವ್ಯವಸ್ಥಿತವಾಗಿ ಸ್ವಾಧೀನಪಡಿಸಿಕೊಳ್ಳುತ್ತಿರುವುದನ್ನು ಖರ್ಗೆ ಖಂಡಿಸಿದರು.

"ಇಂತಹ ವಿಭಜನಕಾರಿ ಸಿದ್ಧಾಂತಗಳನ್ನು ಹೊಂದಿರುವ ಜನರು ಗಾಂಧಿಯವರ ಕನ್ನಡಕ ಮತ್ತು ಅವರ ವಾಕಿಂಗ್ ಸ್ಟಿಕ್ ಅನ್ನು ಸಹ ಕದಿಯಬಹುದು" ಎಂದ ಖರ್ಗೆ, ಸಂವಿಧಾನ ಮತ್ತು ಅದರ ಹಿಂದಿನ ಮಹಾನ್ ನಾಯಕ ವಿರುದ್ಧದ ಪಿತೂರಿಯನ್ನು ಎದುರಿಸುವುದಾಗಿ ಪ್ರತಿಜ್ಞೆ ಮಾಡಿದರು.